Tahpenamoeh

Haghi ni osah maleh eh, maklumlah esok sampai minggu dopan dah nak cuti. Tadi nyambil-nyambil kojo kan, adola berbughak ngan kengkawan den kek opis ni ha , ceghito maso dio kek uni dulu. Dio ceghito maso dio kek uni maghin pandai caghi duit senighi. Opismate den ni lelaki jadi dio citor dio maghin jual ghokok...hehehe. Haiyo..osah pandai eh kau yo. Kok nak tau an kan, maghin ghokok sekotak yang 20 tu ghogo eh duo inggit setongah yo. Lopeh tu dio jual singgit sebatang...umangaiii lobih 100% untung eh. Apola bebudak laki tak koba an kek den maghin yo, kotak mesti den pun bulih jual ghokok..hehe..macam la den beghani.

Den pun ado pengalaman gak bisnes kek hostel uni maghin. Haaa...ado soghang room mate den ni ado sandwich maker, so kito oghang bertigo kumpul duit buek modal boli ghuti, boli sadin, boli bawang...kito buek sandwich sardin. Tapi den tak ingat beghapo inggit den jual maghin....tapi banyak yo la untung eh. Lopeh tu kitoghang poi enjoy kek pasar malam. Bukan posal duit tu yang seghonok eh doh tapi pengalaman yang kito dapek tu. Tu la sobab eh den sughuh anak den jual biskut kek sekolah, tapi den kuarkan modal, duit jualan tu dio joli katak la. Sajo sughuh dio experience sekali sekalo. 

Kito Gen-X ni kan, banyak pengalaman maso kekocik maghin yang Gen-Y ni takdo meghaso sekaghang ni. Aiskrem buek seniri, aiskrem malaysia namo eh..kaler eh meghah yo..tak pun aiskrem milo. Kalau omak masak bubur kacang, tak abih bolih buek aiskrem yo. Main congkak tak yah boli papan congkak doh...koghek lubang bawah ghumah lopeh tu caghi buah gotah buek main. Mano ado oghang main congkak pakai guli....tak cool la!

Dulu-dulu sungai kek kampung den tu osah jeghonih eh...den mo omak den poi ngutip siput sodut kek sungai tu maghin. Bulan lopeh den balik kampung lalu kek sungai tu, olahai koghuh dan somak makamek sungai tu. Siput sodut kek sungai ghaso eh lain makamek dengan yang selalu jual kek pasar tu, dahlah berlumpur. Siput sodut sungai takdo belumpur camtu doh.

Apolah den meghepek memalam buto ni yo..tetibo la teringat joman kekocik maghin. Anak2 den mesti tak paham penamey eh den tulih ni..tu la sobab eh blog ni namo eh tahpenamoeh...